مشرق وسطیٰ کی بگڑتی صورتحال : عرب قیادت کیلئے پالیسی آپشنز

مسلم انسٹیٹیوٹ کے زیر اہتمام نیشنل لائبریری آف پاکستان،اسلام آباد میں ایک راونڈٹیبل ڈسکشن بعنوان ’’مشرق وسطیٰ کی بگڑتی صورتحال: عرب قیادت کے لیے  پالیسی آپشنز‘‘ کا انعقاد کیا گیا- راونڈٹیبل ڈسکشن  میں مشرق وسطیٰ کے موجودہ بحران،اس کی بنیادی وجوہات، خطے پر اس کے اثرات اور موجودہ عرب قیادت کے لیے ممکنہ آپشنز پر روشنی ڈالی گئی-سیکریٹری جنرل موتمر العالم الاسلامی اور سینٹ میں قائد ایوان جناب راجہ ظفر الحق نے سیشن کی صدارت کی-دیگر مقررین میں فلسطین کے سفیر عزت مآب ولید ابو علی،’’کامسیٹس انسٹیٹیوٹ آف انفارمیشن ٹیکنالوجی اسلام آباد‘‘ کے سینٹر فار پالیسی سٹڈیز کی  سربراہ و سابق سفیر محترمہ  فوزیہ نسرین،  سابق ایڈیشنل  سیکریٹری وزارت خارجہ و سابق سفیر جناب اشتیاق ایچ اندرابی، میجر جنرل (ر) جناب رضا محمد،سابق سفیر جناب جاوید حفیظ،انٹرنیشنل سینٹر فار ڈیمو کریٹک ٹرانزیشن، بڈاپسٹ ہنگری کے صدر و سابق سفیر ڈاکٹر استوان گیارمتی (بذریعہ وڈیو لنک)، سابق سفیر جناب افضل اکبر خان، سابق سفیر جناب یونس خان، سابق وفاقی سیکر یٹری  جناب جاوید ظفر، سابق سربراہ ایف سی ایس،نیشنل ڈیفنس یونیورسٹی جناب ڈاکٹر محمد خان،پروفیسرآف انٹرنیشنل ریلیشنز، یلدرم بیازیت یونیورسٹی ڈاکٹر سلکوک کولا کوگلو (بذریعہ وڈیو لنک)، سابق سفیر جناب عامر انور شادانی، انسٹیٹوٹ آف لاجسٹکس و ٹرانسپوٹیشن، برطانیہ کے چارٹرڈ ممبر جناب ڈاکٹر حسن یاسر ملک،  الجزیرہ نیوز کے نامہ نگار جناب اے آر مطر اور مسلم انسٹیٹیوٹ کے ریسرچ ایسوسی ایٹ جناب عثمان حسن شامل تھے- جبکہ پبلک ریلیشنز کوآرڈینیٹر مسلم انسٹیٹیوٹ جناب طاہر محمود نے ماڈریٹر کے فرائض سرانجام دیے -

ڈسکشن میں ہونے والی گفتگو کے اہم نکات درج ذیل ہیں:

اقوام عالم میں مشرق وسطیٰ نہ صرف  جغرافیہ بلکہ مذہبی اعتبار سے بھی ایک منفرد حیثیت رکھتا ہے -  دنیا کے بڑے مذاہب کا آغاز اسی خطے سے ہوا ہے- یہاں مسلمانوں کے تین مقدس مقامات بھی ہیں  اور تیس کروڑ سے زائد مسلمان آباد ہیں مشرق وسطیٰ میں ممالک تیل کی دولت سے مالا مال ہیں جیسا کہ  ایران ، عراق ، سعودی عرب ، کویت ،متحدہ عرب امارات ،  قطر ، اومان، یمن  اور بحرین -   ان ممالک میں دنیا کے  ٪ 48 تیل اور% 38گیس کے ذخائر ہیں - بدقسمتی سے  یہ خطہ اس وقت خانہ جنگی اور تباہی کا شکار ہے - بیسویں صدی کے اوائل میں اس خطے کو سامراجی طاقتوں نے   مصنوعی   حصوں میں تقسیم کر دیا تھا جس پر عرب   قائدین نے بھی  مزاحمت نہ کی - مشرق وسطیٰ اس وقت عالمی طاقتوں کی  پراکسی جنگوں کا میدان بنا ہوا ہے  اور علاقائی ممالک نے بھی اس ضمن میں عالمی طاقتوں کا ساتھ دے کر صورتحال کو مزید خراب کیا ہے- مسلسل بحران کے باعث پناہ گزینوں  کی بڑی تعداد نے نقل مکانی اختیار کی اورمقامی لوگ بھی ابتر معاشی و معاشرتی حالات کی وجہ سے  ہجرت کرنے کو ترجیح دے   رہے ہیں-    خطے کی ابتر صورتحال کی وجہ  ’’ایکسٹرا ریجنل مفادات ‘‘ ( دوسرے  خطے میں  کسی ملک کے  مفادات) ، سعودی عرب اور ایران میں کشیدگی ،  عرب بہار اور مشرقِ وسطیٰ  کے  حکمرانوں کے درمیان طاقت کی جنگ، فرقہ واریت اورنسلی تضاد ات  ہیں-    ان کمزوریوں کا   غیر ملکی عناصر  اور بین الاقوامی طاقتیں   فائدہ اٹھاتی ہیں-  

مشرق وسطیٰ کی صورتحا ل  بگڑتی جا رہی ہے اور سوائے تباہی کے اس کا کوئی انجام نظر نہیں آرہا -  خطے   میں متعدد تنازعات    اور تقسیمات ہیں  جو فلسطین عراق ، مصر ، شام ،لیبیا  اور  یمن تک پھیلے ہوئے  ہیں-  ہر تنا زعے کے اپنے  ماخذ ہیں- ان سب میں مشترک بات یہ ہے کہ  ان   سب کی اندرونی  و بیرونی  جہتیں  ہیں -اندرونی جہت یہ کہ  ہمسایہ ممالک  کے مابین   نظریاتی و     نسلی بنیادوں پہ تضاد  جیسا کہ عراق میں کردوں اور عربوں کی محاذ آرائی  اور شیعہ سنی  کی نظریاتی جنگ- ایسی ہی تقسیمات شام اور یمن میں بھی ہیں-   خطے میں ہر تنازعے کو  اس کے اپنے  معروضی حالات میں پرکھنا ضروری ہے-  شام میں خانہ جنگی  عرب سپرنگ کا نتیجہ ہے جو  کہ بشارالاسد کے خلاف احتجاج سے شروع ہوئی  جس کی وجہ حکومت  کا سیاسی و  معاشی  اصلاحات  کے نفاذ سے کنارہ کشی تھی -  یہ مسئلہ اس وقت زیادہ گھمبیر ہو گیا جب  ہر  فریق  کے مفادات دوسرے سے مختلف ہوگئے-   باغی جن کو امریکہ کی حمایت حاصل ہے  ان  کی یہ کوشش ہے کہ   بشارالاسد کو ہٹایا جائے- جبکہ  فتح الشام  (النصرہ فرنٹ) اپنی قیادت میں وہاں حکومت قائم کرنا چاہتے ہیں- روس  بشارالاسد کی حکومت کی حمایت کر رہا ہے اور اس کے ساتھ ساتھ ایران کی  اور لبنان میں حزب اللہ کی بھی حمایت کر رہاہے- دوسری جانب  حوثیو ں کی یمن میں کامیابی  نے سعودی عرب کےخدشات لاحق کر دیے ہیں کہ  حوثیوں کو ایران اسلحہ فراہم کررہاہے- 

مشرق وسطیٰ بڑے نازک دور سے گزر رہا ہے -  مشرق وسطیٰ کو سب سے بڑا چیلنج یہ ہے کہ   عرب ممالک کے حکمرانوں کے مابین اتحاد قائم کرنا بہت مشکل ہے-یہ کسی بھی پیش رفت کے لیے سب سے بڑی رکاوٹ ہے- بلاشبہ مسئلہ فلسطین  ایک بنیادی مسئلہ ہے لیکن ہم نے اس کو محض  فلسطین اور اسرائیل کے مابین تنازعہ تک محدود کر دیا ہے-  مسئلہ   فلسطین  سارے عرب ممالک اور امت مسلمہ کا مسئلہ ہے-  اس مسئلہ کے حل کے بغیرعرب ممالک کے اسرائیل کے ساتھ دوستانہ تعلقات بھی مسئلہ فلسطین  کے حل میں رکاوٹ  ہیں - 

مشرق وسطیٰ میں موجودہ بحران کی بہت سی اندرونی و بیرونی  وجوہات ہیں، اندرونی وجوہات جن میں سے ایک عرب حکمرانوں کا برا طرزِ حکمرانی  اور آمرانہ طرزِ حکومت بھی ہے-دوسرا  حکمرانوں کی طرف سے عوام کا استحصال اور بڑے پیمانے پہ بد عنوانی بھی ایک وجہ ہے - بین الاقوامی طاقتیں  اپنے  ’’جیو سٹریٹیجک‘‘ اور عالمی معاشی مفادات   اس  خطے میں پورا کرنے کے درپے ہیں -  عرب حکمرانوں کی آپس کی نااتفاقی نے ان کے لیے حالات ساز گار بنا دیے ہیں اورنتیجتاً اور وہ  اپنے مکروہ عزائم کے لیے  اس صورتحال کا پورا فائدہ اٹھائے ہوئے ہیں-  مشرق وسطیٰ کا  حدود اربعہ عالمی سیاست کے اعتبارسے  بہت  اہمیت کا حامل ہے اور یہ اہمیت اس کو صدیوں سے حاصل ہے -  عالمی سیاسی پس منظر اس بات کا شاہد ہے کہ بڑی طاقتوں کے مفادات ہمیشہ اس  خطے پر اثر  انداز ہوئے ہیں  لہٰذا اس بات  کو مد نظر رکھنا بہت ضروری ہے کہ موجودہ صورتحال میں عالمی طاقتوں کے کیا مفادات وابستہ ہیں- اتنے  ممالک کی مداخلت اور مفادات کی وجہ سے  بد امنی اور  غیر مستحکم  ہونا ایک طرح سے اس خطے کی خاصیت بن چکی ہے-

مشرق وسطیٰ کے ممالک کی جغرافیائی  سرحدوں میں وقت کے ساتھ ساتھ بہت سی تبدیلیاں رونما ہوئی-  یہ خطہ بہت   سی پرانی  تہذیبوں جیسا کہ  شامی و  عراقی تہذیبوں کی آماجگاہ رہاہے  پھر یہ خطہ دنیا کے بڑے مذاہب کا مسکن بھی رہا - یہ وہ  وجوہات ہیں جن کے باعث  یہاں طاقت کے لیے جنگ صدیوں سے چلتی آئی ہے-اہم سمندری تجارتی راستے جیسا کے سویز کنال اور خلیج فارس  کو    اپنے محل وقوع کی وجہ سے بہت اہمیت حاصل ہے- سمندری تجارتی راستوں  پہ قبضہ ہمیشہ سے  بڑی طاقتوں کے مفادات میں رہا ہے - یہ عوامل  ہمیشہ  عالمی طاقتوں   کی مشرق وسطیٰ سے متعلق کسی بھی پالیسی میں بر سر پیکار رہے ہیں  جس  پہ ان ممالک کے اندرونی حالات اور خطے کے دیگر ممالک کے آپس میں تعلقات  نے صورتحال کو مزید خراب کیا-