حضرت سُلطان العارفین کا بارگاہِ غوثیت میں خراجِ عقیدت

’’سکندر بھی اُن کی غلامی کا دم بھرتا ہے-اےشاہِ جیلان! (قدس اللہ سرّہٗ)افلاطون کو آپ کے علم کے سامنے اپنی لاعلمی کا اعتراف ہے‘‘-

جہان بھر کے تاجدار آپ کے در کے گدائوں کے بھی گدا ہیں، یہ تاجداری اور یہ سُلطانی آپ ہی کو زیبا ہے،

’’اگر آپ چاہیں تو دم بھر میں شاہوں کو گدا کر دیں اور گداؤں کو شاہ کردیں‘‘-

’’اے غوث ِربانی ! کیسی عالیشان سُلطانی ہے آپ کی کہ قیصربھی آپ کا غلام ہے اور خاقان بھی آپ کے در کا بھکاری ہے ‘‘-

’’ایسی حشمت، ایسی شوکت ، ایسی قدرت اور ایسی عظمت والا کوئی ہوا ہے نہ کوئی ہو گا  خداکی قسم! آپ کا ثانی کوئی نہیں‘‘ -

’’کیا نا سوتی، کیاملکوتی،کیا جبروتی اور کیا لاہُوتی، سب آپ کے زیرِ قدم ہیں، آہا! کیسی عالیشان سُلطانی ہے آپ کی‘‘-

’’حقیقت آپ سے روشن ہوئی، طریقت آپ سے گلشن بنی، آپ آسمانِ شریعت کے چاند اور نورانی خورشید ہیں‘‘-

’’ گلشن ِصوفیا کے سرو ہیں، بزمِ مصطفیٰ (ﷺ)کی شمع ہیں، حضرت علی (رضی اللہ عنہ)کی آنکھوں کی ٹھنڈک ہیں اور اللہ تعالیٰ کے محبوب ہیں‘‘-

’’اے دل! تُو اُن کا مرید ہو جا تا کہ تجھ پر اُن کا لطف و کرم مزید بڑھے اور تُودیکھے کہ وہ کتنے اوصافِ حمیدہ کے مالک ہیں‘‘-

’’پہلے اپنی زبان کو آب ِکوثر سے دھو کر پاک کر لے اور پھر محی الدین قدس سرّہ العزیزکا نام لے‘‘-

’’آپ شاہِ ا ؤلیا ٔ ہیں اور اؤلیا ٔ آپ کے در کے سوالی ہیں - مشائخ آپ کے در پر سر جھکاتے ہیں اور آ پ کی دربانی پر فخر کرتے ہیں‘‘-

ایک اور مقام پہ حضرت سُلطان العارفین فرماتے ہیں :

’’پیر میراں(قدس اللہ سرّہٗ) دین کو زندہ کرنے والے کیوں نہ ہوں کہ وہ رُوح الامین اور وزیر مصطفےٰ(ﷺ) ہیں‘‘-

’’شاہ عبدالقادر(قدس اللہ سرّہٗ) خُدا کی طرف راہبری کرنے والے  ہیں اِس لئے ہر وقت حضور علیہ الصلوٰۃ والسلام کے ہم مجلس رہتے ہیں‘‘-

’’باھُو اُن کے خاکِ پا مریدغلاموں میں سے ایک غلام ہے اِسی لئے تو یہ دوسرے غوث وقطب اؤلیا ٔ سے بلند مرتبہ ہے‘‘-

٭٭٭

سوشل میڈیا پر شِیئر کریں