پاکستان

میری دھرتی مرا تجھ پر ابھی ایمان باقی ہے
محمد (ﷺ) کی بشارت پر میرا ایقان باقی ہے

برستی ہیں خدا کی رحمتیں دن رات خطے پر
خدائے لم یزل کا دین اور قرآن باقی ہے

ہماری سر بلندی ہے یقیں محکم عمل پیہم
ابھی، قائد سے جو باندھا گیا، پیمان باقی ہے

مرے اقبال کے شاہین کی پرواز اونچی ہے
بلندی فکر کی ہے باز کا عنوان باقی ہے

جہاں راوی روایت کر رہا ہے دور شاہی کی
وہیں لاہور میں تاریخ اور ایوان باقی ہے

جئے کشمیر، اور سونے کی دھرتی پنج آبے کی
کہ گلگت ،سندھ، خیبر اور بلوچستان باقی ہے

قلندر شان سیہون کی کراچی دولت کشور
مری تہذیب میرا قریۂ مہران باقی ہے

مرے (مسلم) نے تھاما ہے ہلالی سبز پر چم کو
ھو الحق ھو مرے باھو کا یہ فیضان باقی ہے

بہ شکل سید ہجویر فیض قدس جاری ہے
خوشا زریں کہ یہ گنجینۂ عرفان باقی ہے

٭٭٭