اقبال تری فکر ونظر سب سے جدا ہے (نظم)

امت کے جوانوں پہ تری خاص نظر ہے
اب تک تیرے پیغام کا ذہنوں پہ اثر ہے

ملتا ہے کہیں درسِ خودی تیری نِدا میں
نُصرت کے اشارے ہیں کہیں حرف و دعا میں

اقبالؔ تری فکر و نظر سب سے جُدا ہے
خالق کی ترے شعر پہ بے مثل عطا ہے

نظموں میں تری خاص ہی تاثیرِ سُخن ہے
غزلیں ہیں کہ پھیلا ہوا پر نُور چمن ہے

یہ تُو نے دیا درس کہ یکجائی ہے لازم
ظاہر کے سوا دل کی بھی بینائی ہے لازم

سوئی ہوئی اک قوم کو ہے تُو نے جگایا
خودداری و بیداری کا ہے راز بتایا

پیدا نہ ہوا پھر کوئی اقبالؔ سا حُب دار
تھا جس کا سخن سوز سے اور فکر سے سرشار

اے کاش کہ اقبالؔ کی آواز کو سمجھیں
جو قلب سے نکلا ہے اُسی ساز کو سمجھیں

مولا کرے مقبول دُعا حضرتِ اقبالؔ
یہ امتِ مسکین ہو اے کاش کہ خوشحال

٭٭٭