وضو کے فرائض ،سُنن ومستحبات، مکروہات،مسنون دعائیں اور اہمیت

’’یا اﷲ پاک! میرے گناہ بخش دے، میری کوشش قبول فرما اور میری تجارت میں نقصان نہ ہو‘‘-

وضو کی اہمیت و فضائل کے بارے میں تقریباً تمام محدثین اور مفسرین نے اپنی اپنی کتب میں روایات رقم فرمائی ہیں-ان میں سےصرف چند روایات لکھنے کی سعادت حاصل کرتے ہیں :

پانی کے ہر قطرے کے بدلے فرشتے کی پیدائش:

سُلطان العارفین، حضرت سخی سُلطان باھو (رح) ایک روایت نقل فرماتے ہیں کہ :

’’حضور نبی کریم (ﷺ) کا فرمان مبارک ہے: ’’جو آدمی وضو کرتے وقت’’ لَآاِلٰہَ اِلَّا اللّٰہُ ‘‘پڑھتا رہے گا تو وضو سے گرنے والے پانی کے ہر قطرے سے اللہ تعالیٰ ایک فرشتہ پیدا کرے گا جو قیامت تک اِس کلمہ کو پڑھتا رہے گااور اُس کا ثواب کلمہ پڑھنے والے کو ملتا رہے گا‘‘-[14]

وضو کے بعد کلمہ شہادت:

حضرت عمر بن خطاب (رض)سے مروی ہے کہ سیّدی رسول اللہ (ﷺ) نے ارشادفرمایا:

’’جو شخص اچھی طرح وضو کرنے کے بعد کہے:

أَشْهَدُ أَنْ لَّا إِلَهَ إِلَّا اللهُ وَحْدَهُ لَا شَرِيكَ لَهُ، وَ أَشْهَدُ أَنَّ مُحَمَّدًا عَبْدُهُ وَرَسُولُهُ

’’میں گواہی دیتا ہوں کہ اللہ کے سوا کوئی معبود نہیں اور حضرت محمد(ﷺ)اللہ کے (خاص مقرب) بندے اور اس کے رسول ہیں ‘‘-

اس کیلئے جنت کے آٹھوں دروازے کھول دیے جاتے ہیں، جس دروازے سے چاہے، جنت میں داخل ہو جائے‘‘-[15]

وضوکرنے کے بعد دورکعت نمازپڑھنا یعنی تحیۃ الوضو ء ادا کرنا:

سیّدی رسول اللہ (ﷺ) نےارشاد فرمایا:

’’جس نے میرےاس وضو کے مطابق وضو کیا پھر دو رکعت نماز (دل کی پوری توجہ کے ساتھ ) ایسی پڑھی جو حدیث نفس سے خالی رہی (یعنی دل میں ادھر ادھر کی باتیں نہیں سوچیں) تو اس کے پچھلے سارے گناہ معاف کر دیے جائیں گے‘‘-[16]

 ایک اور روایت میں حضرت ابوہریرہ(رض) سے مروی ہے کہ حضور نبی کریم (ﷺ) نے حضرت بلال (رض)  سے نمازِفجر کے وقت ارشاد فرمایا کہ:

’’اے بلال! تم مجھے امید کا کام بتاؤ جو تم نے حالت اسلام میں کیا ہوکیونکہ میں نے جنت میں اپنے آگے تمہارے جوتوں کی آواز سنی ہے حضرت بلال (رض)نے عرض کی: اسلام میں جو عمل بھی میں نے کئے ہیں اُن میں سب سے زیادہ جس عمل سے مجھے نفع کی توقع ہے وہ یہ کہ جب بھی میں نے دن یا رات میں پوری پاکی حاصل کی تواس طہارت کے ساتھ جتنے نوافل میرے لئے مقدر تھے وہ میں نے ادا کیے (یعنی وضو کر کے نوافل و نماز (تحیۃالوضوء)اداکی‘‘-[17]

مسلم کی روایت ہے کہ سیدی رسول اللہ (ﷺ) نے ارشادفرمایا :

’’جو شخص وضو کرے اور اچھی طرح وضو کرے اور ظاہر و باطن کے ساتھ متوجہ ہوکر (دل لگا کر) دو رکعت پڑھے اس کےلیے جنت واجب ہوجاتی ہے‘‘-[18]

نوٹ:ان احادیث مبارکہ کا مطالعہ کرنے سے واضح ہوتا ہے کہ یہ نماز مردوعورت دونوں کے لئے یکساں ہے- تحیۃ  المسجد پڑھ لینے سے یہ نماز بھی ادا ہوجائے گی- فجر کی نماز کے علاوہ دیگر اوقات میں یہ نفل ادا کرسکتے ہیں- تاہم جب مسجد پہنچے اور اذان ہوگئی ہو توسنت مؤکدہ کی ادائیگی کے ساتھ تحیۃ المسجد اور تحیۃ الوضوء کی نیت کرلینے سے تینوں کے لئے کفایت کرجائے گی- یہ نماز وضو کے فورًا بعد پڑھی جائے جیسا کہ حدیث سے ظاہرہوتا ہے، تاخیر کی صورت میں نمازسنت الوضوء کا وقت فوت ہوجائے گا-

وضو کے وقت انگلیوں مبارکہ سے پانی کے چشمے جاری ہونا:

حضرت انس بن مالک (رض) سے مروی ہے کہ سیّدی رسول اللہ (ﷺ) نے کچھ صحابہ کرام(رض) سے پانی طلب فرمایا -سیدی رسول اللہ (ﷺ)نے ارشادفرمایا:

’’کیاتم میں سے کسی کے پاس پانی ہے؟ (کچھ پانی پیش کیا گیا تو) سیدی رسول اللہ (ﷺ) نے اپنا دست اقدس پانی میں رکھا اور ارشاد فرمایا کہ اللہ عزوجل کا نام لے کر وضو کرو ،پس میں نے دیکھا کہ پانی آپ (ﷺ) کی انگلیوں مبارکہ سے نکل رہاتھا-حتیٰ کہ آخری صحابیٔ رسول  (ﷺ) نے وضو کر لیا-حضرت ثابت (رض) فرماتے ہیں کہ میں نے حضرت انس (رض) سے پوچھا کہ تمہاری تعداد کتنی تھی؟ ‌تو آپ (رض) نے فرمایا کہ تقریباً 70 تھی‘‘-[19]

روزِ محشر اعضاء کا چمکنا:

’’حضرت ابو ہریرہ(رض) سے روایت ہے فرماتے ہیں کہ میں نے سیّدی رسول اللہ (ﷺ) کو ارشادفرماتے ہوئے سُنا:

’’قیامت کے روز میرے اُمتی اعضائے وضو کی چمک کے باعث سفید چہرے اور سفید ٹانگوں والے (پنج کلیان) کہہ کر بلائے جائیں گے- جو تم میں سے اپنی چمک کو بڑھانے کی طاقت رکھتا ہے اسے بڑھانی چاہیے ‘‘-[20]

رزق میں وسعت وکشادگی:

حضرت خالد بن ولید (رض) سے مروی ہے کہ:

’’ایک شخص نے بارگاہِ رسالت مآب (ﷺ) میں عرض کی (یارسول اللہ( ﷺ)!میں چاہتا ہوں کہ مجھ پر رزق وسیع ہو جائے تو آپ (ﷺ) نے ارشاد فرمایا: طہارت پہ ہمیشگی اختیار کر (یعنی ہمیشہ باوضو رہے) تجھ پر رزق وسیع کردیاجائے گا‘‘-[21]

گنا ہوں کی معافی :

’’حضرت عمرو بن عبسہ سلمی (رض) (ایک طویل روایت میں) بیان کرتے ہیں کہ میں نے عرض کیا : یا نبی اللہ! مجھے وضو کے متعلق بتلائیے! آپ (ﷺ) نے ارشاد فرمایا :

’’تم میں سے جو شخص بھی ثواب کی نیت سے وضو کرتا ہے، کُلی کرتا ہے، ناک میں پانی ڈالتا ہے، ناک صاف کرتا ہے، اللہ تعالیٰ اس کے چہرے، منہ اور نتھنوں کے گناہوں کو مٹا دیتا ہے، پھر جب وہ اللہ تعالیٰ کے حکم کے مطابق چہرہ دھوتا ہے تو داڑھی کے اطراف سے اس کے چہرہ کے گناہ پانی کے ساتھ جھڑ جاتے ہیں، پھر جب وہ کہنیوں تک ہاتھ دھوتا ہے تو ہاتھوں کے پوروں سے پانی کے ساتھ اس کے ہاتھوں کے گناہ جھڑ جاتے ہیں، پھر جب وہ سر کا مسح کرتا ہے تو بالوں کے سِروں سے اس کے سر کے گناہ پانی کے ساتھ جھڑ جاتے ہیں اور جب وہ ٹخنوں سمیت پاؤں دھوتا ہے تو پوروں سے لے کر ٹانگوں تک اس کے گناہ پانی سے جھڑ جاتے ہیں، پھر اگر وہ کھڑے ہو کر نماز پڑھے جس میں اللہ تعالیٰ کی ایسی حمد و ثناء اور تعظیم کرے جو اس کی شان کے لائق ہے اور دل کو ماسوی اللہ سے پاک کرکے اللہ تعالیٰ (کی عبادت) کی طرف متوجہ ہوا تو نماز سے فارغ ہونے کے بعد وہ گناہوں سے اس طرح پاک ہو جائے گا جیسا کہ اس کی ماں نے اسے ابھی جنا ہو‘‘ -[22]

حضرت ابو امامہ (رض) سے روایت ہے کہ سیّدی رسول اللہ (ﷺ) نے ارشاد فرمایا:

’’جو شخص نماز کے ارادے سے وضو کرنا شروع کرتا ہے اور اپنی ہتھیلیوں کو دھوتا ہے، پہلے قطرے کے ساتھ ہی اس کی ہتھیلیوں کے تمام گناہ ساقط ہوجاتے ہیں اور جب کلی کرتا ہے، ناک میں پانی ڈالتا ہے اور ناک جھاڑتا ہے تو اس کی زبان اور ہونٹوں کے تمام گناہ پہلے قطرے کے ساتھ ہی دُھل جاتے ہیں اور جب اپنے چہرے کو دھوتا ہے تو اس کے کان اور آنکھ کے تمام گناہ پہلے قطرے کے ساتھ ہی سےختم ہوجاتےہیں اور جب اپنے ہاتھوں کو کہنیوں تک اور پاؤں کو ٹخنوں تک دھوتا ہے تو وہ اپنے ہر گناہ سے محفوظ ہو چکا ہوتا ہے اور وہ گناہوں سے اس طرح پاک ہو چکا ہوتا ہے جیسے اس کی ماں نے اس کو جنا تھا ،حضور نبی کریم ( ﷺ) نے ارشاد فرمایا:’’اگر وہ نماز کے لئے کھڑا ہو تو اللہ تعالیٰ اس کا درجہ بلند کرتا ہے اور اگر بیٹھ جائے تو گناہوں سے پاک صاف ہوتا ہے‘‘- [23]

ایک دوسری روایت میں حضرت ابو امامہ(رض) بیان کرتے ہیں کہ میں نے سیّدی رسول اللہ (ﷺ) کو ارشاد فرماتے ہوئے سنا:

’’جس شخص نے مکمل وضو کیا، اپنے ہاتھوں اور چہرے کو دھویا، سر اور کانوں کا مسح کیا پھر فرض نماز ادا کی- اس کے اُس دن کے وہ تمام گناہ معاف کر دیئے جاتے ہیں جو اس کے پاؤں نے چل کر، ہاتھوں نے پکڑ کر، کانوں نے سن کر یا آنکھوں نے دیکھ کر کیے اور اس کے دل نے برے ارادے کیے- راوی کہتے ہیں کہ خدا کی قسم! میں نے حضور نبی کریم ( ﷺ) سے اتنا کچھ سنا ہے کہ اسے شمار نہیں کرسکتا‘‘-[24]

حضرت عثمان ذوالنورین (رض) کی حضور نبی کریم (ﷺ) کی اداؤں سے عشق ومحبت:

’’امیر المؤمنین حضرت عثمانِ غنی(رض) ایک بار وُضو کرتے ہوئے مسکرانے لگے! لوگوں نے وجہ پوچھی تو فرمانے لگے: میں نے ایک مرتبہ حضور نبی کریم (ﷺ) کو اسی جگہ پر وُضو فرمانے کے بعد مسکراتے ہوئے دیکھا تھا‘‘-[25]

اسی طرح اَمیرُالمؤمنین حضرت عثمانِ غنی(رض)نے ایک ٹھنڈی رات میں جب نماز کا ارادہ فرمایا: تو اپنے غلام حضرت حُمران (رض) سے وضو کیلئے پانی مانگا- غلام نے پانی پیش کیا تو آپ (رض) اُ س سے ہاتھ اور منہ دھونے لگے- (وُضو شروع فرمایا تو) غلام نےعرض کی:اللہ پاک آپ کو محفوظ فرمائے-آپ وُضو فرما رہے ہیں جبکہ رات تو بہت ٹھنڈی ہے، آپ (رض) نے جوابًا ارشاد فرمایا: میں نے حضور نبی کریم( ﷺ)کو ارشادفرماتے سُنا ہے کہ جو بندہ کامل وضو کرتا ہے، اللہ پاک اس کےاگلےپچھلےگناہ بخش دیتا ہے-[26]

ہر معاملے میں اپنی امت کا خیال و دھیان رکھنا:

حضرت سُلیمان بن بُریدہ (رض) اپنے والد محترم سے روایت بیان کرتے ہیں کہ

’’حضور نبی کریم (ﷺ)(زیادہ تر ) ہر نماز کے لیے وضو فرماتے پس جب فتح مکہ کے دن تھا تو آپ (ﷺ)نے وضو فرمایااور اپنے موزوں پر مسح فرمایا اور ایک وضو کے ساتھ پانچ نمازیں ادا فرمائیں تو حضرت عمرفاروق (رض) نے عرض کی: یا رسول اللہ (ﷺ) آپ (ﷺ) نے ایساعمل فرمایا ہے جو آپ (ﷺ) (پہلے) نہیں کیا کرتے تھے؟ توآپ (ﷺ) نے ارشادفرمایا کہ اے عمر! یہ میں جان بوجھ کرکیا ہے ‘‘-[27]

علماء کرام نے لکھا ہے کہ یہ عمل آپ (ﷺ) اپنی امت کے جواز کی خاطر کیا تاکہ اگر کوئی عمل کرنا چاہیے تو اس کیلئے سُنت موجود ہو- جیسا کہ علامہ اسماعیل حقی (رح)اس روایت کو لکھنے کے بعد لکھتے ہیں کہ:

’’حضورنبی کریم (ﷺ) کا یہ عمل مبارک محض جواز کے بیان کے لیے تھا ورنہ ہر فرض نماز کے لئے تازہ وضو کرنا مستحب ہے ‘‘- [28]

سلف صالحین کی وضو سے محبت:

بعض اصفیاء کا طریقہ تھا کہ وہ غیبت ،کذب اور غصے کے بعد تجدید وضو فرماتے-اس لیے کہ ایسے افعال سے نفس کا غلبہ اور شیطان کی شرارت ظاہر ہوتی ہے اور وضو ایک ایسا نور ہے جس کی برکت سے نفس اور شیطان کی تاریکیاں مٹ جاتی ہیں-بعض بزرگوں کے بارے میں مشہور ہے ان کے چہرے پر زخم تھے اور12 سال تک وضو کرنے کی وجہ سے اچھے نہ ہو سکے لیکن انہوں نے کبھی وضو نہ چھوڑا- (اسی طرح کا واقعہ ہے کہ) ایک بزرگ کی آنکھ میں کالا موتیا اتر آیا- ڈاکٹر نے علاج کے لئے وضو کا چھوڑنا لازم قرار دیا -اس مرد خدا نے فرمایا کہ آنکھ جاتی ہے تو جائے لیکن میں وضو نہیں چھوڑ سکتا-آخر کار وہ نابینا ہوگئے -انہوں نے آنکھ کے جانے کو تو پسند کیا لیکن وضوء تر ک نہیں کیا- [29]

بیان کردہ روایت کو مدِّ نظر رکھتے ہوئے ہمیں بھی غور کرنا چاہیے کہ کیا ہمیں بھی اچھے طریقے سے وضو کرنا آتا ہے؟اگر نہیں آتا تو ہم سیکھیں، کیا ہم بھی فرائض وسُنن کے پابند ہیں اور ان پر عمل کرنے کا جذبہ رکھتے ہیں؟وضو پر وضو خود ایک مستحب عمل ہے اور اس سے دل میں نور پیدا ہوتا ہے جیسا کہ علامہ اسماعیل حقی (رح) لکھتے ہیں کہ:

’’تجدید وضو سے باطن میں نورانی کیفیت پیدا ہوتی ہے‘‘-[30]

اللہ عزوجل فرائض و واجبات اور سُنن و مستحبات کی بجا آوری کرنے کی توفیق عطا فرمائے- آمِیْن ثم آمین-

٭٭٭

سوشل میڈیا پر شِیئر کریں